MASCHERANO: "WAMEMPIGA MATEKE NEYMAR NA KUMTUPA NJE!"

Created: Saturday, 20 June 2015 16:19

Mchezaji wa Argentina Javier Mascherano amesema Wachezaji wenye vipaji wanahitaji kulindwa kwenye Mechi za Nchi za Marekani ya Kusini.

Mascherano, ambae anacheza Klabu moja Barcelona na Neymar wa Brazil, amedai Staa huyo hakulindwa na ametupwa nje ya Copa America.

Neymar alipewa Kadi Nyekundu na Refa wa Chile Enrique Osses baada ya Mechi ya Kundi C la Copa America ambayo Brazil ilifungwa 1-0 na Colombia Jumatano iliyopita kumalizika na Jana CONMEBOL, Shirikisho la Soka la Nchi za Marekani ya Kusini, lilimfungia Mechi 4 ikimaanisha hatacheza tena Mechi zilizobaki za Copa America.

Mascherano amesema kuwa kwa mara nyingine tena Waamuzi wamemwangusha Neymar.

Ameeleza: "Vitu kama hivi vinatokea tu kwenye Soka la Marekani ya Kusini na hasa zaidi kwenye Copa America ambalo ni gumu kwa Wachezaji kama Neymar wasiolindwa kama huko Ulaya. Neymar alipigwa Mateke mara 20 na badala yake akaonyeshwa Kadi ya Njano kwa kushika Mpira. Wachezaji kama hawa wenye vipaji hawaruhusiwi kucheza. Wanashambuliwa sana na kuumizwa. Lazima tufanye jitihada kuwalinda. Alipigwa Mateke mara 20. Hili linakuathiri kichwani. Usisahau Neymar ni Neymar, ni Kijana wa Miaka 23. Sasa Brazil wamepoteza sana!"

HABARI ZA AWALI

NEYMAR ATUPWA NJE COPA AMERICA!

Shirikisho la Soka la Nchi za Marekani ya Kusini, CONMEBOL, limemfungia Kepteni wa Brazil Neymar Mechi 4 na hivyo kumtupa nje ya Copa America ambayo Brazil inashiriki.

Kifungo hiki kinamaanisha Neymar ataikosa Mechi ya mwisho ya Brazil ya Kundi C la Copa America na pia Robo Fainali na Nusu Fainali ikiwa Brazil itafuzu.

Juzi, CONMEBOL awali ilimfungia Neymar Mechi 1 baada ya kupewa Kadi Nyekundu Jumatano wakati Brazil inachapwa 1-0 na Colombia katika Mechi ya Kundi C la Copa America huko Nchini Chile.

Kifungo hicho kilimfanya Neymar kuikosa Mechi ya mwisho ya Kundi C watayocheza Jumapili dhidi ya Venezuela Mechi ambayo ni muhimu mno kwao kufuzu kutinga Robo Fainali kwani Timu zote za Kundi hilo zimefungana zikiwa na Pointi 4 kila mmoja.

Hata hivyo, wakati huo, Neymar alikuwa tayari aikose Mechi hiyo na Venezuela kwani alikuwa ameshazoa Jumla ya Kadi za Njano mbili katika Mashindano hayo.

Katika Mechi hiyo na Colombo, Neymar alionyeshwa Kadi Nyekundu na Refa wa Chile Enrique Osses Mpira ukiwa umekwisha baada kumbabatiza na Mpira Mchezaji wa Colombia Pablo Armero kitu ambacho kilizua rabsha na Neymar kuonekana akijaribu kumpiga Kichwa Mchezaji mwingine wa Colombia.

Katika rabsha hizo, Mchezaji wa Colombia, Carlos Bacca, nae alipewa Kadi Nyekundu.

CONMEBOL ikitangaza Kifungo hiki cha Neymar imetamka kuwa wote, Neymar na Bacca, wana haki ya kukata Rufaa.

Mwaka 2014, huko Nchini kwao Brazil, Neymar alilazimika kuondoka kwenye Fainali za Kombe la Dunia na kukosa Mechi zilizobakia baada ya kupigwa Goti Mgongoni na Mchezaji wa Colombia Juan Zuniga na kuvunjwa Mfupa wa Mgongoni bila ya huyo Zuniga kuadhibiwa.